OH HERR
Musik: H. Knipp, Bläck Fööss
Text: H. Knipp, Bläck Fööss
Verlag: Manuskript
Jahr: 2000


1. Oh Herr, setz dem Üvverfluß Jrenze,
un loß de Jrenze üvverflüssig weede.
Loß de Lück kei Falschjeld maache,
ävver och et Jeld kein falsche Lück.
Nemm dä Wiever et letzte Woot,
un erinnere die Männer an ihr eetstes.
Oh Herr, setz dem Üvverfluß Jrenze,
un loß de Jrenze üvverflüssig weede.

Herr, sorch dofür!
Herr, sorch dofür!
Herr, sorch dofür!

2. Oh Herr, schenk dä Fründe mih Wohrheit,
un d‘r Wohrheit immer mih Fründe.
Hilf dä Beamte un all denne Tätije,
die wohl tätig, ävver nit wohltätig sin.
Jevv dä Rejierende e besser Deutsch,
un dä Deutsche en bessere Rejierung.
Oh Herr, schenk dä Fründe mih Wohrheit,
un d’r Wohrheit immer mih Fründe.

Herr, sorch dofür!
Herr, sorch dofür!
Herr, sorch dofür!

3. Un kütt et Engk für uns he op Ääde,
oh Herr, dann loß uns all Engelcher weede.
Herr, verjevv uns all unser Sünde,
mir han d’r doch dä schöne Dom jebaut.
Loß uns bitte en d’r Himmel ren,
un halt de Dür, oh Herr, nit zo vun inne.
Un kütt et Engk für uns he op Ääde,
oh Herr, dann loß uns all Engelcher weede.

Herr, sorch dofür!
Herr, sorch dofür!
Herr, sorch dofür!

Ävver loß d’r noch Zick!
Ävver loß d’r noch Zick!
Ävver loß d’r noch Zick!
© BLÄCK FÖÖSS