Unser Bäumche T.H.Knipp   Hellichovend kom eran, d’r Pap dä wor op Jöck - de Mamm hatt üverall jesök un sat, wo es dä Jeck. Do fehl ihr en hä mot jo noch e Bäumche kaufe jon - op Hellichovend, typisch Schäng, wä wollt, sollt dat verston. Et wooten vier, et wooten fünf, de Dämmerung trok ald op do kom jet Kleines, krumm un scheif, de Stroß zom Huus erop. Ich hatt en dann als ehts erkannt un reef: et Bäumche kütt, de Mamm die sat, als sei et soch, mein Jott, dat jitt et nit! Refrain: Unser Bäumche, o Tannenbaum unser Bäumche, dat wor nen Draum. Unser Bäumche verjess ich nie, nä su ne schöne Baum wie dä krijje m’r niemols mih. Dä Pap, dä wor janz stolz un sat, es dä nit wunderschön, de Mamm. die wor am laache, jo winnichstens es hä jrön. Dat Bäumche wor noch nit ens huh, dofür unheimlich krumm, de Mamm die sat, dat scheife Ding, dat kriste nie zom Ston. D’r Pap janz drüch, no waat ens af, hä es jo noch janz rüh, wenn do ehts alles dran es, erkenns de dä nit mih. Dat Bäumche links, en Fläsch Schabau rächs ungerm Ärm jeklemmp, dat wor et Letzte wat ich soch, als hä en et Zemmer jing. Refrain: Unser Bäumche ..... Die Dür, die schloß hä immer af, et durf im keiner ren, denn keiner sollt dat Wunder, dat do passierten, sin. Zoeesch wor hä am säje, dä Baum wor doch esu klein, dann hoot mer’n plötzlich näle, ich daach dä Baum jing en. En Zick lang wor et dann janz still, kein Tönche us dem Raum op eimol hoot mer’n singe janz laut “O Tannebaum”. Ich jläuv, jetz dät’eren schmücke, met Jlöckcher un esu, “Es ist ein Ros entsprungen” kom falsch un vill zo huh! Refrain: Unser Bäumche ..... Op eimol jov et dann ne Knall, dann wood et furchbar still “Zo Bethlehem jeboren” kom leis met vill Jeföhl. Noh zwei Stund kom ‘e endlich ‘rus, et Schlemmste wor jedon, ich luurt en an, hä sat och jet, ich kunnt en nit verston! Öm ach Uhr wor Bescherung, dä Pap wie immer fit, en singem beste Anzoch, de Mamm em schwatze Kleid. Hä dät mem Jlöckche lügge, dann sunge mer e Leed, un sochen dann dat Bäumche, met Käze en d’r Eck: Refrain: Unser Bäumche ..... Et wor noch kleiner als vürher, doch wirklich wunderschön, stund käzejrad un nit mih krumm, ein Wunder war jeschehn! Ich hatt e Rädche kräje, mingen allerjrötsten Draum, dann jov et Ovendesse, unger däm schöne Baum. Wat ich dann ehts vill späder vun im erfahre han vum Pap, dä hück nit mih met uns Kreßdaach fiere kann - dat wat ich für e Wunder heelt, woren zwei Näl en d’r Wand, vun do en Kood rund öm d’r Baum dröm hat hä feste Stand!