M: Martin Buß / T: Martin Buß, Bläck Fööss

 

Strophe 1

Wenn ich nur noch eimol singe künnt

Nur noch ei Leed, wat wör et dann?

Wat dät ich nemme? Wat dät ich föhle?

Wat wör dä allerletzte Klang?

En Ballad, die mich richtig ömhäut

Wo jede Ton noh Hätzbloot klingk

E Leed, dat mich janz still mäht

Weil mer vull Sehnsuch en ahl Erinnerunge schwemmp

 

Strophe 2

Dät ich vum Fridde singe wie John Lennon

Oder „Niemols jeiht mer su janz“

Sach ich stolz: „I did it my way“

En Dir verschlunge bei nem Danz

Sing ich vun Nächte met Fründe

Vun Laache, dat durch offene Finster floch

Vun däm Jlöck, he doheim ze sin

Ejal, wohin et Levve – mich ens trock

 

Refrain:

Wat es dat allerletzte Leed?

Wat singk mer, wenn et dunkler weed?

Un sin die Trone, die mer kriesch

Bestemmp vun Trauer oder Jlöck?

Oder sing ich nur dovun

Wat mich jemaat hät, wie ich ben

Vun all dä Freud, die ich jehatt

Un däm Jeföhl: Ich wor e Kind vun minger Stadt

 

Strophe 3

Doch bei Dir, do mööt dat Leed su richtig knalle

Dat Dir et Hätz wie et Trömmelche jeiht

Un donoh höösch em Dunkele schunkele

Bes mer sich Ärm en Ärm dann litt

„Denk och ens dat Leed, wo jeder metsingk!“

Dat uns en de Kindheit widder brengk

An eine Daach, an eine Minsch

Dä Augebleck, dä nit wie Rauch verflüch em Wind

 

Refrain

 

Bridge:

Un do verston ich op eimol:

Et es nit wichtig, wat ich sing

Nur dat et ech es un vun Hätze kütt

Un och e bessje noh mir klingk

 

Finaler Ref.:

Dat letzte Leed sing ich vun Kölle

Vun mingem Levve he am Rhing

Vun all dä dausende Momente

Die mich jemaat han, wie ich ben

Un es d’r letzte Ton verklunge

Bliev et nit still – nur dat Jeföhl

Et Jrößte es met üch zo singe

Op dat et letzte Leed, nie janz verklingk