KATHARINA HENOT
Musik: H. Knipp, Bläck Fööss
Text: H. Knipp, Bläck Fööss

Jahr: 2004

Gesprochen:
M’r schrevv et Johr 1627. All daachten se,
die Zick der Hexenverfolgung wör vorbei,
als et och en Kölle widder lossjing.
En janz Europa leete hundertdausende vun Minsche om
Scheiterhaufe ihr Lääve.
Stellvertretend für se all steit he die Kölner Postmeisterin
Katharina Henot.

1. Em hellije Kölle vür 400 Johr
läävte et Katharina Henot,
en jestandne staatse Frau, huh aanjesinn,
stund se em Lääve ihre Mann.
Se wor stolz un joddesfürchtich
un däät jän helfe. Wat hät et ihr jebraat?
Noh Verleumdung wäjen Hexerei
wood se aanjeklaach.

2. Bes op et Bloot jefoltert han se dich,
se nohmen sich dat Rääch.
Zerbroche han se dinge Liev,
doch ding Siel, die han se nit jekrääch.
Lur zom letzte Mol noch zom Himmel rop,
küß em Lääve nit mih heim.
Op Melote wor di Golgatha,
besiejelt am Blaue Stein.

Un se hatt doch nur ei Lääve, ei Lääve ze jevve.

Refrain:
Salve Katharina in memoriam,
du bes für uns die Königin.
Salve, salve Regina Katharina
du läävs en unserm Hätze dren.

3. Un de Kirch, unfählbar, domols su wie hück
kannt kein Minschlichkeit, kei Erbarmen.
Zesamme met d’r Obrigkeit braat se vill Leid
anstatt Jeräächtigkeit.
Wenn Glaube zor Verblendung weed,
statt Liebe nur Haß un Angs rejiert,
dann storv Jesus janz ömsöns am Krüzz.
Han de Minsche jemols drus jeliert?

Un hä hatt doch nur si Lääve, si Lääve ze jevve.

Refrain:
Salve Katharina in memoriam…

Salve Katharina in memoriam,
du bes für uns die Königin.
Salve, salve Regina Katharina,
du wees uns unverjeßlich sin.

© BLÄCK FÖÖSS