Musik: Bläck Fööss, J. Schnabel
Text: H. Knipp, J. Schnabel, Bläck Fööss
Verlag: Manuskript
Jahr: 2004
Präambel:
Am rheinischen Wesen soll die Welt genesen,
hät der liebe Jott am elften Schöpfungsdaach jesaat.
Die bisherigen Wesen waren's noch nicht so recht gewesen,
dröm hät hä he am Rhing si Meisterstück jemaat.
1. Johr für Johr, do froge sich die Lück der Republik:
Saat, sidd ehr eijentlich nur em Fernseh'n su oder sidd ehr wirklich esu verröck?
Wie maat ihr dat, wie jeit dat bloß, wie kritt ehr dat nur hin?
Do laache mer nor un luuren uns an un sage denne woröm.
He jitt et ei Jesetz und dat verrode mer üch jetzt:
Refrain:
Et es wie et es un et kütt wie et kütt,
un et hät noch immer jootjejange,
nix bliev wie et es.
Drink doch eine met, dat hammer immer su jemaat,
denn wat fott es, dat es fott.
Dreimol Kölle Alaaf!
2. Streng verbodde es zum Beispiel
an ner Kneip vorbeijonn, ohne renzojonn,
oder einfach heimjonn, wenn andre noch do stonn.
Beim Früh e Alt bestelle, dobei dreimol Helau,
dat darf m'r nit, dat määt m'r nit, dofür küß de he en d' r Bau.
3. Mondaachs pünklich zor Arbeit kumme, jilt he als beklopp',
dem Chef dann noch e Uhr afkäue, bah pfui, kumm hür mir op.
Beim Klüngele sich erwische losse, su blöd darf m‘r nit sin.
Dat jeit doch nit, dat deit m‘r nit, dat weed he nit jän jesin.
Refrain:
Et es wie et es un et kütt wie et kütt…
Un dat, dat darfs de och nit!
4. Will dich einer bütze, un du wees stief für Schreck,
dann will hä dich noch schunkele, un du läufs einfach weg.
Dä es vielleich jet anders, dat es uns och ejal,
denn jede Jeck es anders he, dat es bei uns normal.
Refrain:
Et es wie et es un et kütt wie et kütt…
5. Jetzt wesst ehr wat m‘r darf, un wat m‘r besser blieve löt.
Wä sich dodran hält, hät he d'r Himmel op d'r Ääd.
Et es doch wirklich einfach, doch wä dat nit versteit,
dat es en ärme Sau, dä deit uns wirklich leid,
denn mir han he unser Jesetz
vum eetste Schrei bes zu jooderletzt.
Refrain:
Et es wie et es un et kütt wie et kütt,
un et hät noch immer jootjejange,
nix bliev wie et es.
Drink doch eine met, dat hammer immer su jemaat,
denn wat fott es, dat es fott.
Dreimol Kölle, dreimol Kölle,
dreimol Kölle Alaaf!